मलामी गएर फर्कँदै गरेका वृद्धको मृत्यु

काठमाडौँ । पाँचथरमा मलामी गएर घर फर्किंदै गरेका वृद्धको भिरबाट लडेर मृत्यु भएको छ।

फिदिम नगरपालिका ८ घलेगाँउका ६५ वर्षीय पदमबहादुर राईको भिरबाट लडेर मृत्यु भएको प्रहरीले जनाएको छ।

फिदिम १४ बाँसबोटेको भिरबाट लडेका राईको घटनास्थलमै मृत्यु भएको जिल्ला प्रहरी कार्यालय पाँचथरले जनाएको छ।

सोमबार छिमेकीको मलामी गएका राई अबेरसम्म घर नआएपछि खोजी गर्ने क्रममा आफन्तले उनको शव फेला पारेका हुन्। गोरेटो बाटोबाट झन्डै एक सय मिटर तल राईलाई मृत अवस्थामा भेटिएको प्रहरीले जनाएको छ।