लागूऔषध कारोबारी वडाअध्यक्ष पक्राउ

काठमाडौं । लागूऔषध ब्राउन सुगरसहित पर्साका एक वडाध्यक्षलाई प्रहरीले पक्राउ गरेको छ। पक्राउ पर्नेमा पकहाँ मैनपुर गाउँपालिका–१ का वडाध्यक्ष अमिरिका सहनी छन्।

उनीसहित पर्सा पकाहामैनपुर–१ का ४० वर्षीय बलिष्टर सहनी र सोही ठाउँका ५२ वर्षीय रामआदेश सहनीलाई पनि ब्राउनसुगरसहित पर्सा प्रहरीले पक्राउ गरेको हो।

इलाका प्रहरी कार्यालय पोखरियाबाट खटिएको प्रहरी टोलीले वीरगञ्ज महानगरपालिका–१९ बर्वाबाट पक्राउ गरेको हो। सरकारी नम्बर प्लेटको बा १ ब ३५९५ र ना ६२ प १९४२ मोटरसाइकलमा सवार उनीहरुलाई जाँच गर्ने क्रममा ब्राउन सुगर भेटिएको हो।

वडाध्यक्षले चलाएको सरकारी मोटरसाइकलको फिल्टर बस्कबाट ७९ ग्राम ब्राउन सुगर भेटिएको प्रहरीले जनाएको छ।