यस्तो छ चीनबाट खोप ल्याउने नेपाल एयरलाइन्सको उडान तालिका

नेपालले चीनबाट कोरोना भाइरसविरुद्धको खोप ल्याउने उडान तालिका सार्वजनिक भएको छ।

प्रधानमन्त्री केपी शर्मा ओलीका परराष्ट्र सल्लाहकार डाक्टर राजन भट्टराईले उडान तालिका सार्वजनिक गरेका हुन् । उनका अनुसार चीनबाट ४० लाख डोज खोप ल्याइनेछ ।

यसै साता चीन सरकारसँग खरिद गरेको कोरोनाविरुद्धको खोप लिन नेपाल वायुसेवा निगमको विमान बेइजिङ जाने भएको छ । सरकारले चीनको सिनोफार्म कम्पनीसँग खरिद गरेको खोप ल्याउनको लागि निगमले एयरबस–३३० विमान चीन पठाउन लागेको हो । निगमले ३ चरणमा खोप ल्याउने प्रस्ताव गरेको छ ।

यसको लागि निगमको पहिलो कार्गो उडान काठमाडौं–बेइजिङ असार यसै साताको बिहीबार (२४ असार)मा चीन प्रस्थान गर्ने उडान तालिका रहेको निगमले जनाएको छ ।

सो विमान २५ गते शुक्रबार खोप लिएर काठमाडौं अवतरण गर्नेछ । दोश्रो कार्गो उडान भने ३१ गते असार काठमाडौं–बेइजिङको लागि उडान भर्ने छ भने साउन १ मा विमान बेइजिङबाट काठमाडौंको लागि उडान भर्ने कार्यतालिका रहेको निगमकी प्रवक्ता करिश्मा श्रेष्ठले बताइन् ।