डोजरको बकेटले हिर्काएर सर्लाहीमा वडाध्यक्षको हत्या

सर्लाहीको ईश्वरपुर नगरपालिकाका एक वडाध्यक्षको हत्या भएको छ। ईश्वरपुर नगरपालिका-३ भक्तिपुरका वडाध्यक्ष सूर्यकुमार श्रेष्ठको शुक्रबार राति हत्या भएको जिल्ला प्रहरी कार्यालय सर्लाहीले जनाएको छ।

प्रहरीका अनुसार वडामा रहेको मुखलाल दास पोखरीको सौन्दर्यकरणको निरीक्षण गर्न गएका वडाध्यक्ष श्रेष्ठको डोजरको बकेटले हानेर हत्या भएको हो ।

ईश्वरपुर नगरपालिका-३ मै रहेको मुखलाल दास पोखरीको सौन्दर्यीकरण कार्यको निरीक्षण गर्नका लागि पुगेको बेला वडाध्यक्ष श्रेष्ठको हत्या भएको ईश्वरपुर नगरपालिकाका प्रमुख मनोज देवकोटाले जानकारी दिए ।

पोखरी निरीक्षणका लागि जाने क्रममा वडाध्यक्ष श्रेष्ठ, ठेकेदार दाहाल र जेसीबी चालक हर्षबहादुर तामाङसँगै खाजा खान पुगेको र त्यहीँ विवाद भएको जिल्ला प्रहरी कार्यालय सर्लाहीका प्रहरी नायव उपरीक्षक मदन कुँवरले जानकारी दिए ।

प्रहरीले ठेकेदार ईश्वरपुर-३ कै प्रेमराज दाहाल र जेसीबी चालक रविन तामाङ भनिने हर्षबहादुर तामाङलाई पक्राउ गरेको छ। वडाध्यक्ष श्रेष्ठको शवको पोष्टमार्टमको तयारी भइरहेको प्रहरीले जनाएको छ।