

काठमाडौं । गोकर्णेश्वर नगरपालिका–४ स्थित यज्ञडोल (जगडोल) सामुदायिक वन क्षेत्रमा रहेको राष्ट्रिय शहीद स्मारकको भवनमा २५ शøयाको आइसोलेसन सञ्चालन गरेको छ ।
नगरपालिका, यज्ञडोल (जगडोल) सामुदायिक वन उपभोक्ता समूह र लायन्स क्लब इन्टरनेसनल डिस्ट्रिक ३२५ ए १ को सहयोगमा आइसोलेसन सञ्चालन गरिएको नगरपालिकाका स्वास्थ्य शाखा प्रमुख हरिप्रसाद उपाध्यायले राससलाई जानकारी दिए । सामुदायिक वनमा रहेको स्मारकका भवनमा यसअघि गत वर्ष पनि आइसोलेसन सञ्चालन गरिएको थियो ।
आइसोलेसनमा गोकर्ण प्राथमिक अस्पतालका चिकित्सकले स्वास्थ्य सेवा दिएको नगरपालिकाले जनाएको छ । यसैगरी लायन्स क्लबका तर्फबाट आइसोलेसनमा अक्सिजनको व्यवस्थासमेत गरिएको छ । आइसोलेसन सञ्चालन भएपछि होम आइसोलेसन नहुनेका लागि सहज भएको जनाइएको छ ।
नगरपालिकामा हालसम्म ४ हजार ३ सय ४८ जना कोरोना संक्रमित भएका छन् । नयाँ भेरियन्टसहितको दोस्रो लहरको कोरोना फैलिएपछि २ हजार २२ संक्रमित भइसकेका छन् । गत वर्ष पहिलो चरणको कोरोनाले २ हजार ३ सय ४८ संक्रमित भएका थिए ।
दोस्रो लहरमा संक्रमित भएकामध्ये १ हजार ३ सय ८९ जना घर फर्केका छन् । ५ सय ९७ अहिले पनि सक्रिय संक्रमित छन् । दोस्रो लहरको कोरोनाले नगरपालिकाका ३६ नगरवासीको निधन भएको स्वास्थ्य शाखाले जनाएको छ । गत वर्ष पहिलो चरणको कोरोनाले भने २८ जनाको निधन भएको थियो ।
नगर क्षेत्रमा कोरोनाको लक्षण देखिएकालाई गोकर्ण प्राथमिक अस्पतालमा सोमबार र बिहीबार स्वाब संकलन गरी परीक्षणका लागि टेकु अस्पताल पठाउने गरिएको छ । यसैगरी नारायणटारस्थित शंखरापुर अस्पतालमा बुधबार पीसीआर परीक्षणका लागि स्वाब संकलन गर्ने गरिएको छ । अत्यावश्यक भई परीक्षण गर्नुपरेमा भने एन्टिजेन परीक्षण गर्ने गरिएको नगरपालिकाले जनाएको छ ।